28.8.12

ಖುಷಿಯ ಅಳು

ಒಳ ಕೋಣೆಯಲ್ಲಿ
ಬಟ್ಟೆ ಬದಲಿಸಿ, ಮುಖವೊರೆಸಿ
ಪೌಡರ್‌ ಬಳಿದು ಬಂದರೂ
ಖುಷಿಯ ಕಣ್ಣೀರು
ಇನ್ನೂ ತೊಟ್ಟಿಕ್ಕುತ್ತಿದೆ
ಸಂತೈಸಲು ಹೋದರೆ
ಸಾಂತ್ವನದ ಶಬ್ದಗಳು ಸಿಗಲಾರವು

ಹೊರಗೆಲ್ಲೋ ಸುತ್ತಾಡಹೋದ
ಖುಷಿಗೆ ಕಂಡಿದ್ದು
ಬರಡು ಗದ್ದೆಗಳು,
ಖಾಲಿ ಖಾಲಿ ಹಳ್ಳಿಗಳು
ಇವೆಲ್ಲದರ ಅರಿವೇ ಇಲ್ಲದೆ
ಗಹಗಹಿಸುವ ನಗರಗಳ
ಅಟ್ಟಹಾಸ ನೋಡಿ
ಖುಷಿಯ ಮಂದಹಾಸ ಕರಗಿದೆ

ಬಾನಾಡಿಗಳ
ಮೊಟ್ಟೆಯನ್ನು ಯಾರೋ
ಕಸಿದು ಒಡೆದಿದ್ದಾರೆ
ಹಸಿರಿನ ಮಧ್ಯೆ ಕೆಂಪುಮಣ್ಣು
ಬಾಯ್ಬಿಟ್ಟಿದೆ,
ಹಳ್ಳಿಗನೊಬ್ಬ ಆಸೆಯಿಂದ ಮೋಡ
ನೋಡುತ್ತಿದ್ದಾನೆ
ಇನ್ನು ಖುಷಿ
ನಗುವುದೆಂದರೆ ಹೇಗೆ!

ಹುಸಿ ಪ್ರಾಮಾಣಿಕತೆಯ
ತೆವಲು, ವಿಶ್ವಾಸದ
ಸೆರಗಿನೆಡೆಯಲ್ಲಿ
ಅಡಗಿರುವ ಅಲಗು,
ದುರಾಸೆಯ ಕೂಪಗಳನ್ನು ಕಂಡು
ಕನಲಿದ್ದಾಳೆ ಖುಷಿ
ಖುಷಿಯ ಖುಷಿ
ಕರಗುತ್ತಲೇ ಇದೆ

ಓ ದೇವರೆ
ಹೊರಗೆ ಸುರಿಯುವ ಮಳೆ
ಹನಿಗಳಲ್ಲಿ ಖುಷಿಯ
ಬಿಕ್ಕಳಿಗೆ ಸೇರಿ ಹೋಗಲಿ
ಮಗುವಿನ ನಗು
ಆಕೆಯ ಮೊಗವರಳಿಸಲಿ
ಅಲ್ಲೋ ಇಲ್ಲೋ ತೆರೆದು
ಕೊಳ್ಳುವ ಸೂರ್ಯಕಾಂತಿ
ಹೂಗಳು ಖುಷಿಗೆ ಹಾರೈಸಲಿ!
Related Posts Plugin for WordPress, Blogger...