10.2.19

ಕೇದಾರಕಂಠದ ಚಳಿಗಾಲ ಚಾರಣ

sunrise on kedarkantha peak


ಮೈನಸ್ 10-15ರ ವರೆಗೂ ಇಳಿಯುವ ತಾಪಮಾನ...ರಾಶಿ ರಾಶಿ ಹತ್ತಿಯಂತೆ ಬಿದ್ದಿರುವ ಹಿಮ...ರಕ್ತವೂ ಹೆಪ್ಪುಗಟ್ಟೀತೆ ಎನ್ನುವ ಚಳಿ...ಬಿದ್ದ ಮಂಜಿನಿಂದ ಕಾಲೆತ್ತುತ್ತಾ ನಡೆದು ಸುತ್ತ ನೋಡಿದರೆ ಬೆರಗುಗೊಳಿಸುವ ಹಿಮಶಿಖರಗಳ ಸಾಲು...

ಹಿಮಾಲಯದ ವಿವಿಧ ಪ್ರವಾಸೀ ತಾಣಗಳಿಗೆ, ಚಾರಣ ಪ್ರದೇಶಗಳಿಗೆ ಬೇಸಿಗೆಯಲ್ಲಿ ನಡೆದು ನೋಡುವವರ ಸಂಖ್ಯೆ ಹೆಚ್ಚು. ಡಿಸೆಂಬರ್‌ನಿಂದ ಫೆಬ್ರವರಿ ವರೆಗೆ ಹಿಮಾಲಯದಲ್ಲಿ ಕಠೋರ ಚಳಿಗಾಲ..ಆದರೆ ಆಗಲೂ ಅದನ್ನು ಇಷ್ಟಪಟ್ಟು ಚಾರಣಕ್ಕೆ ಹೋಗುವವರ ಸಂಖ್ಯೆ ಇತ್ತಿತ್ತಲಾಗಿ ಹೆಚ್ಚತೊಡಗಿದೆ.
ಹೀಗೆ ಸಾಗಿದವರಿಗೆ ಸಿಗುವ ಬೋನಸ್ ಎಂದರೆ ಮೂರು ಮೂರು ಪದರ ಬಟ್ಟೆಯನ್ನು ಮೈಮೇಲೆ ಹಾಕಿಕೊಳ್ಳುವ ವಿಶೇಷ ಅನುಭವ, ಹೊರಗೆ ಸುತ್ತ ಕಾಣುವ ಪೈನ್, ಓಕ್ ವೃಕ್ಷ ಸಾಲುಗಳ ಮಧ್ಯೆ ಹತ್ತಿಯ ಚೂರಿನಂತೆ ಸುರಿಯುವ ಹಿಮದ ಮಳೆಯನ್ನು ಟೆಂಟ್ ಒಳಗೆ ಕುಳಿತು ವೀಕ್ಷಿಸುವ, ಮುಖದಲ್ಲಿ ಇನ್ನು ಮುಚ್ಚಲು ಜಾಗವಿಲ್ಲದಷ್ಟು ಮಂಕಿ ಕ್ಯಾಪ್ ಧರಿಸಿ, ಕೇವಲ ಮೂಗು ಕಣ್ಣು ಬಾಯಿಯನ್ನಷ್ಟೇ ಉಳಿಸಿ, ಬಿಸಿಬಿಸಿ ಕಾಫಿ ಹೀರುವ ಸುಖ ಇನ್ನೆಲ್ಲಿ ಸಿಗಲು ಸಾಧ್ಯ!

ಉತ್ತರಾಖಂಡದ ಕೇದಾರಕಂಠ
ಹಿಮಾಲಯದಲ್ಲಿ ತೀರ್ಥಾಟನೆಗೆ ತೆರಳುವವರಿಗೆ ಕೇದಾರನಾಥನ ಪರಿಚಯ ಇದ್ದೇ ಇದೆ. ಆದರೆ ನಾನಿಲ್ಲಿ ಹೇಳಹೊರಟಿರುವುದು ಕೇದಾರನಾಥ ಕ್ಷೇತ್ರದಿಂದ 100 ಕಿ.ಮೀ ದೂರವಿರುವ ಕೇದಾರಕಂಠದ ಬಗ್ಗೆ.
ಸಮುದ್ರ ಮಟ್ಟದಿಂದ 12900 ಅಡಿ ಎತ್ತರದಲ್ಲಿರುವ ಪರ್ವತ ಶಿಖರ ಕೇದಾರಕಂಠ. ಇದರ ಮೇಲ್ಭಾಗದಲ್ಲಿ ಚಿಕ್ಕ ಗುಡಿಯಿದೆ, ಅಲ್ಲಿ ಗಾಢವಾಗಿ ಸುರಿದಿರುವ ಮಂಜಿನ ನಡುವೆ ಕಪ್ಪು ಕಲ್ಲಿನ ಗಣಪನಿದ್ದಾನೆ. ರಾಶಿ ಕಲ್ಲುಗಳ ನಡುವೆ ತ್ರಿಶೂಲವಿದೆ. ಅದು ಬಿಟ್ಟರೆ ಅದೊಂದು ಸಾಹಸೀ ಚಾರಣಿಗರಿಗೆ ಸವಾಲೆಸೆಯುವ ಸುಂದರ ಹಿಮ-ಕಲ್ಲುಗಳ ಬೆಟ್ಟ.
ಉತ್ತರಾಖಂಡ್ ರಾಜ್ಯದ ಉತ್ತರ ಕಾಶಿ ಜಿಲ್ಲೆಯ ಪುರೋಲಾ ಎಂಬ ಪಟ್ಟಣಕ್ಕೆ ತಾಗಿಕೊಂಡಿರುವ ಸಾಂಕ್ರಿ ಎಂಬ ಹಳ್ಳಿಯೇ ಕೇದಾರಕಂಠಕ್ಕೆ ಹೋಗುವ ದ್ವಾರ.ಹಿಮಾಲಯವನ್ನು ಚಳಿಗಾಲದಲ್ಲಿ ನೋಡಲೇಬೇಕು ಎಂಬ ಹುಮ್ಮಸ್ಸಿನವರಿಗೆ ಮುಕ್ತ ಆಹ್ವಾನ ನೀಡುತ್ತದೆ ಕೇದಾರಕಂಠ.

ಸಾಂಕ್ರಿಯೆಂಬ ಹಳ್ಳಿ

ಗೋವಿಂದ ರಾಷ್ಟ್ರೀಯ ಉದ್ಯಾನವನದ ವ್ಯಾಪ್ತಿಯ ಗಢವಾಲ್ ಶ್ರೇಣಿಯ ಶಿಖರಗಳಲ್ಲಿ ಕೇದಾರಕಂಠವೂ ಒಂದು. ಕೇದಾರಕಂಠಕ್ಕೆ ಹೋಗುವುದಕ್ಕೆ ಮೊದಲು ನಿಮ್ಮನ್ನು ಅಲ್ಲಿನ ವಾತಾವರಣಕ್ಕೆ ಹದಗೊಳಿಸುವುದಕ್ಕೆ(ಪರ್ವಾತೋರಹಣ ಭಾಷೆಯಲ್ಲಿ ಇದಕ್ಕೆ ಅಕ್ಲಮಟೈಸೇಶನ್ ಎನ್ನುತ್ತಾರೆ) ಇದೇ ಹಳ್ಳಿಯಲ್ಲಿ ಎರಡು ದಿನ ಇರಿಸಲಾಗುತ್ತದೆ.

ಮೈನಸ್ ಡಿಗ್ರಿ ಚಳಿ ಎಂದರೆ ಹೇಗಿರುತ್ತದೆ ಎನ್ನುವುದು ಇಲ್ಲಿ ತಿಳಿಯುತ್ತದೆ.  ಕನಿಷ್ಠ ಸೌಲಭ್ಯವಿದ್ದ ಹಳ್ಳಿಯಾಗಿದ್ದ ಸಾಂಕ್ರಿ ಕೇವಲ ಚಾರಣದ ಬೇಸ್ ಕ್ಯಾಂಪ್ ಎಂಬ ಕಾರಣದಿಂದ ಸಾಕಷ್ಟು ಅಭಿವೃದ್ಧಿ ಕಂಡಿದೆ. ನಾನು ತೆರಳಿದ್ದ ಯೂತ್ ಹಾಸ್ಟಲ್‌ಅಸೋಸಿಯೇಶನ್ ಆಫ್ ಇಂಡಿಯಾದ ಕ್ಯಾಂಪ್ ಸೇರಿದಂತೆ 20ಕ್ಕೂ ಹೆಚ್ಚು ವಿವಿಧ ಚಾರಣ ಸಂಸ್ಥೆಗಳು ಇಲ್ಲಿ ಬೇಸ್ ಕ್ಯಾಂಪ್ ಹಾಕಿಕೊಂಡು ಚಾರಣಾಸಕ್ತರನ್ನು ಕೇದಾರಕಂಠವೂ ಸೇರಿದಂತೆ ಹಲವು ಕಡೆಗಳಿಗೆ ಕೊಂಡೊಯ್ಯುತ್ತದೆ.
ಪರ್ವತದ ಇಳಿಜಾರಿನಲ್ಲಿರುವ ಸಾಂಕ್ರಿಯಲ್ಲಿ ಮೇಲಿನಿಂದ ಕೆಳಗಿನ ವರೆಗೂ ವಿವಿಧ ಹಂತಗಳಲ್ಲಿ ಗದ್ದೆ ನಿರ್ಮಿಸಿ ಕೃಷಿ, ಸೇಬಿನ ತೋಟ ರಚಿಸಲಾಗಿದೆ. ಇದು ಬಿಟ್ಟರೆ ಹೈನುಗಾರಿಕೆ. ಯುವಕರಿಗೆ ಪ್ರಮುಖವಾಗಿ ಚಾರಣದ ಸೀಸನ್‌ನಲ್ಲಿ ಗೈಡ್‌ಗಳಾಗಿ ಹೋಗುವುದು ಆಪ್ಯಾಯಮಾನ.

sliding in snow is fun
majestic view
ಜುಡಾ ಕಾ ತಾಲಾಬ್ ಎಂಬ ಕೊಳ!

ಸಾಂಕ್ರಿಯಿಂದ ಹೊರಟು ಕೇದಾರಕಂಠತ್ತ ಹೆಜ್ಜೆ ಹಾಕುವಾಗ ಮೊದಲು ಸಿಗುವ ತಾಣ ಜುಡಾ ಕಾ ತಾಲಾಬ್. ಎಂದರೆ ಜೋಡಿ ಸರೋವರ. ಎರಡು ಕೊಳಗಳು ಒಟ್ಟಾಗಿರುತ್ತದೆ, ಆದರೆ ಇದು ಚಳಿಗಾಲವಲ್ಲವೇ ಇಡೀ ಕೊಳವೇ ಐಸ್ ಆಗಿ ಪರಿವರ್ತಿತಗೊಂಡಿದೆ. ಆಗಮಿಸುವ ಚಾರಣಿಗರು ಕೊಳದ ಮೇಲಿನ ಘನವಾದ ಮಂಜುಗಡ್ಡೆಯ ಮೇಲೆ ಕುಣಿದಾಡಿ ಖುಷಿ ಪಡುತ್ತಾರೆ. ಸುತ್ತಲೂ ಪೈನ್ ವೃಕ್ಷಗಳು ಅದರ ಮೇಲೆ ಇಣುಕುವ ಪರ್ವತ ಶಿಖರ, ಕೆಳಗೆ ಮಂಜುಗಟ್ಟಿದ ಕೊಳ, ಈ ನೋಟವನ್ನು ಚಾರಣಿಗರು ಮನದಣಿಯೇ ಆಸ್ವಾದಿಸುತ್ತಾರೆ.
colourfull tents of various trekking teams
ಜುಡಾ ಕಾ ತಾಲಾಬ್ ಕೆಡುತ್ತದೆ ಎಂಬ ಆತಂಕದಿಂದ ಉತ್ತರಾಖಂಡ ರಾಜ್ಯ ಸರ್ಕಾರ ಅದರ ಬದಿಯೇ ಶಿಬಿರ ಹಾಕುವುದನ್ನು ನಿಷೇಧಿಸುರುವುದರಿಂದ ಅದರ ತುಸು ಕೆಳಗಿನ ಕಾಡಿನಲ್ಲೇ ಶಿಬಿರ ಹೂಡಿದೆವು. ಸಾಯಂಕಾಲ 6ಕ್ಕೆಲ್ಲಾ ಈ ಪರ್ವತದಲ್ಲಿ ಕತ್ತಲಾವರಿಸುತ್ತದೆ. ಶಿಬಿರಕ್ಕೆ ವಿದ್ಯುತ್ ಇಲ್ಲ, ಹಾಗಾಗಿ 5.30ಕ್ಕೆ ಊಟ, 6-7ಕ್ಕೇ ಟೆಂಟ್ ಒಳಗೆ ಹೋಗಿ ಸ್ಲೀಪಿಂಗ್ ಬ್ಯಾಗ್‌ನೊಳಗೆ ಹೊಕ್ಕು ಮಲಗಿಬಿಡಬೇಕು!
ಮರುದಿನ ಪ್ರಯಾಣ ಲುಹಾಸು ಎನ್ನುವ ಪ್ರದೇಶಕ್ಕೆ. ಇದು ಕೇದಾರಕಂಠದ ಬುಡದಲ್ಲೇ ಇರುವ ಕ್ಯಾಂಪ್. ಕೇದಾರಕಂಠದ ತಪ್ಪಲಿನ ದಟ್ಟ ಪೈನ್ ವೃಕ್ಷ, ದೇವದಾರ್, ಓಕ್ ವೃಕ್ಷಗಳ ಕಾಡಿನ ಬದಿಯಲ್ಲಿನ ಮನಮೋಹಕ ಶಿಬಿರ. ಕೆಲ ಹೊತ್ತು ಹೊರಗೆ ಸುಮ್ಮನೆ ನಿಂತರೂ ಮರಗಟ್ಟಿಸುವ ಚಳಿ!
snow fallen on rocks and trees


✷✷✷✷✷✷✷✷


ಇದೇ ಶ್ರೇಣಿಯಲ್ಲಿ ಬರುವ ಹರ್ ಕೀ ದೂನ್, ರುಪಿನ್ ಪಾಸ್, ಬಾಲಿ ಪಾಸ್ ಮುಂತಾದ ಪರ್ವತ ಸಮೂಹಗಳು ಸೇರಿವೆ. ಗಢವಾಲ್ ಹಿಮಾಲಯದ ಅತಿ ಪವಿತ್ರ ಎಂದು ಪರಿಗಣಿಸಲ್ಪಟ್ಟ ಸ್ವರ್ಗಾರೋಹಿಣಿ ಪರ್ವತ ಸಮೂಹ ಕೇದಾರಕಂಠ ಚಾರಣದುದ್ದಕ್ಕೂ ನಿಮ್ಮನ್ನು ವೀಕ್ಷಿಸುತ್ತಲೇ ಇರುತ್ತದೆ. ಅದರ ಪಕ್ಕದಲ್ಲಿರುವ ಕಾಲಾ ನಾಗ್(ಕಪ್ಪು ನಾಗನಂತೆ ಗೋಚರಿಸುವ ಕಾರಣ ಈ ಹೆಸರು), ಅದರ ಪಕ್ಕದಲ್ಲೇ ಬಂಡಾರ್‌ಪೂಂಚ್(ಹನುಮಂತನ ಬಾಲ), ಬಳಿಕ ಯಮುನೋತ್ರಿ, ಗಂಗೋತ್ರಿಗಳು ಗೋಚರಿಸುತ್ತವೆ.

tents of trekking groups

29.6.18

ಯಾಣಕ್ಕೆ ಮಳೆಗಾಲ ಸೈಕಲ್ ಸವಾರಿ

ಪ್ರಕೃತಿಯನ್ನು ವೀಕ್ಷಿಸುವುದಕ್ಕೆ ಆಪ್ತವಾದ ಕಾಲವೆಂದರೆ ಮಳೆಗಾಲ. ಹಾಗೆ ಮಳೆಯಲ್ಲಿ ತೊಯ್ಯುತ್ತಾ ಪ್ರಕೃತಿಯ ನಡುವೆ ಸಾಗುವುದಕ್ಕೆ ಪ್ರಕೃತಿಯ ಚೆಲುವು ಕಣ್ತುಂಬಿಕೊಳ್ಳುವುದಕ್ಕೆ ಸೂಕ್ತ ಚಾರಣ ಅಥವಾ ಸೈಕಲ್ ಟೂರ್.
ಇವೆರಡೂ ನನಗೆ ಆಪ್ತ. ಈ ಬಾರಿಯ ಸೈಕಲ್ ಟೂರಿಗೆ ಮಂಗಳೂರು ಬೈಸಿಕಲ್ ಕ್ಲಬ್ ಎಂಬಿಸಿಯ ನಾವು ಐವರು ಸಿದ್ಧರಾದೆವು. ಎಂಬಿಸಿಯ ಗಣೇಶ್ ನಾಯಕ್ ನಾವು ಹೋಗುವ ತಾಣ ಅದು ಯಾಣ ಎಂದು ನಿರ್ಧರಿಸಿಯಾಗಿತ್ತು. ಭಾನುವಾರದ ಒಂದೇ ರಜೆ ನಮ್ಮೆಲ್ಲರಿಗೆ. ಮಂಗಳೂರಿನಿಂದಲೇ ಸೈಕಲ್ ತುಳಿದು 230 ಕಿ.ಮೀ ದೂರದ ಯಾಣಕ್ಕೆ ಹೋಗಿ ಬರುವುದು ಒಂದು ದಿನದಲ್ಲಿ ಅಸಾಧ್ಯ. ಹಾಗಾಗಿ ಬೇರೆ ವಿಧಿಯಿಲ್ಲದೆ ಮೂರು ಕಾರುಗಳಲ್ಲಿ ನಮ್ಮ ಸೈಕಲ್ ಹೇರಿಕೊಂಡು ಹೊರಟೆವು.
ಕಾರೇರಿ ಸೈಕ್ಲಿಂಗ್ ಹೊರಟವರು!

ಇಂಥ ದೃಶ್ಯವೆಲ್ಲ ಸಿಟಿಯಲ್ಲೆಲ್ಲಿ !

ಯಾಣದ ದಾರಿಯಲ್ಲೊಂದು ನಖರಾ ಚಿತ್ರ

ಹಸಿರದಾರಿಯಲ್ಲಿ ಸವಾರಿ

ನಮ್ಮ ಟೀಂ

ಪೋಸಿಂಗ್





ಭೈರವೇಶ್ವರ ಶಿಖರದ ಮುಂದೆ


ಗಣೇಶ್ ನಾಯಕ್, ಚಿನ್ಮಯ ದೇಲಂಪಾಡಿ, ಹಿಮಾಚಲ ಪ್ರದೇಶ ಮೂಲದ ದಂತ ವೈದ್ಯ ಆಕಾಶ್ ಅಗ್ನಿಹೋತ್ರಿ, ಶ್ರೀಕಾಂತ್ ರಾಜ, ನಾನು ನಾವೈವರು ಸೈಕಲ್ ಸವಾರರಾದರೆ ಕಾಲೇಜು ಉಪನ್ಯಾಸಕ ಹರಿಪ್ರಸಾದ್ ಹಾಗೂ ಅವರ ಮಗಳು ಅಹನಾ-ಇದು ನಮ್ಮ ಈ ಟೂರಿನ ತಂಡ. ಹರಿಪ್ರಸಾದ್ ಮತ್ತು ಅಹನ ಸೈಕಲ್ ತರದೆ ಕೇವಲ ಪ್ರವಾಸದ ಮಜಾ ಅನುಭವಿಸಲು ಬಂದಿದ್ದರು, ಇನ್ನೊಂದರ್ಥದಲ್ಲಿ ನಮ್ಮ ಸೈಕಲ್ ಸವಾರಿಯ ಛಾಯಾಗ್ರಹಣ, ಜತೆಗೆ ಅಗತ್ಯ ನೆರವು ನೀಡುವ ಜವಾಬ್ದಾರಿಯನ್ನೂ ಅಲಿಖಿತ ನಿಯಮದಂತೆ ಬೆನ್ನೇರಿಸಿಕೊಂಡಿದ್ದರು.
ಮೊನ್ನೆ ಭಾನುವಾರ ಮಂಗಳೂರು ಮುಂಜಾನೆಯ ಜಡಿಮಳೆಗೆ ತೊಪ್ಪೆಯಾಗಿ ಮಲಗಿರುವಾಗಲೇ ನಮ್ಮ ಕಾರುಗಳು ಹೊರಟವು. ದಾರಿ ಮಧ್ಯೆ ಕುಂದಾಪುರದಲ್ಲಿ ಹೊಟ್ಟೆ ತುಂಬಿಸಿಕೊಂಡು ಸಾಂಗವಾಗಿ ಸಾಗಿ ಕುಮಟಾ ಸೇರಿದೆವು. ದಾರಿಯುದ್ದಕ್ಕೂ ಅಲ್ಲಲ್ಲಿ ಮಳೆ ನಮಗೆ ಹಾಯ್ ಹೇಳುತ್ತಲೇ ಇತ್ತು.
ಕುಮಟಾ ಪೇಟೆಯಲ್ಲೇ ನಮ್ಮ ಕಾರು ನಿಲ್ಲಿಸಿ, ಸೈಕ್ಲಿಂಗ್ ದಿರಿಸು ಧರಿಸುವಾಗ ಕುತೂಹಲಿ ಸ್ಥಳೀಯರು ನಮ್ಮ ವೇಷವನ್ನೂ, ನಮ್ಮ ಸೈಕಲ್ಗಳನ್ನೂ ಅಚ್ಚರಿಯಿಂದ ಗಮನಿಸಿದರು. ಅವರ ಕುತೂಹಲದ ಪ್ರಶ್ನೆಗಳಿಗೆ ಉತ್ತರಿಸುತ್ತಲೇ ಹೊರಟೆವು.
ಯಾಣಕ್ಕೆ ಸ್ವಾಗತ
ಕುಮಟಾ ಸೇತುವೆ ದಾಟಿ, ಬಲಕ್ಕೆ ತಿರುಗಿ ಏರು ದಾರಿಯಲ್ಲಿ ಸಾಗುವಾಗ ಚಳಿಯೆಲ್ಲಾ ಬಿಟ್ಟು ವಾರ್ಮ್ ಅಪ್ ಆದಂತಾಯ್ತು. ನಾವು ನಮ್ಮ ಖುಷಿಗೆ ಹೊರಟಿದ್ದರೆ ದಾರಿಯಲ್ಲಿ ತಮ್ಮ ಕಾಯಕವನ್ನು ಮಾಡುವ ಮಹಿಳೆಯರು ಕಾಡಿನಿಂದ ಸೊಪ್ಪಿನ ಕಟ್ಟು ಹೊತ್ತು ಶಿಸ್ತಿನಲ್ಲಿ ನಡೆದು ಬರುತ್ತಿದ್ದರು. ದಾರಿಯುದ್ದಕ್ಕೂ ಮಳೆ ಸೃಷ್ಟಿಸಿದ ದೃಶ್ಯಕಾವ್ಯವನ್ನು ಸವಿಯಲು, ಕಣ್ತುಂಬಿಕೊಳ್ಳುವ ಜತೆಗೆ ಕ್ಯಾಮೆರಾದಲ್ಲಿ ದಾಖಲಿಸಲು ಸಾಕಷ್ಟು ಸಮಯ ನೀಡುತ್ತಾ ಮುಂದುವರಿದೆವು. ಮುರಕಲ್ಲಿನ ಪಾದೆ ಪ್ರದೇಶ, ಅಲ್ಲಿ ಅಲ್ಲಲ್ಲಿ ಉಂಟಾದ ಪಳ್ಳಗಳು(ಚಿಕ್ಕ ಗುಂಡಿ ತುಂಬ ಶುಭ್ರ ನೀರು), ಅಲ್ಲಲ್ಲಿ ಹಸಿರು ಹುಲ್ಲು ಹಿನ್ನೆಲೆಯಲ್ಲಿ ಕಾಡು ಇವುಗಳು ನೀಡುವ ಖುಷಿಯೇ ಬೇರೆ.
ಸೈಕಲ್ ಬಿಟ್ಟು ಕೈಕಾಲ್ ಬಳಕೆ
ಕುಮಟಾ-ಶಿರಸಿ ರಸ್ತೆಯಲ್ಲಿ ಸುಮಾರು 13 ಕಿ.ಮೀ ಚಲಿಸಿ, ಕತಗಾಲ, ಅಂತ್ರವಳ್ಳಿ ದಾಟಿ ಹೈವೇ ಬಿಟ್ಟು ಎಡಕ್ಕೆ ಹೊರಳಿದರೆ ದಟ್ಟಾರಣ್ಯ. ಅದರ ನಡುವೆ ನಮ್ಮ ನಿರೀಕ್ಷೆಯನ್ನೂ ಮೀರಿ ಉತ್ತಮ ರಸ್ತೆಯೇ ಇತ್ತು. ಐದು ಸೈಕಲ್ಲುಗಳು ಮುಂದೆ ಸಾಗುತ್ತಿದ್ದರೆ ನಮ್ಮ ಹಿಂದೆ ಅಥವಾ ಮುಂದೆ ಅಪ್ಪ-ಮಗಳು ಇದ್ದ ಕಾರು ಇತ್ತು. ಮಳೆಗಾಲವಾಗಿದ್ದರಿಂದಲೋ ಏನೋ ಯಾಣಕ್ಕೆ ಬರುವ ಪ್ರವಾಸಿಗರ ಸಂಖ್ಯೆ ಬಹಳ ಕಡಿಮೆಯೆನ್ನಬಹುದು. ಹಾಗಾಗಿ ರಸ್ತೆ ನಮಗೇ ಬರೆದುಕೊಟ್ಟಂತೆ ಆಗಿತ್ತು. ಅದಕ್ಕಾಗಿಯೇ ಗಣೇಶ್ ನಾಯಕ್ ನಮ್ಮೆಲ್ಲರನ್ನೂ ಬೇಕು ಬೇಕಾದಂತೆ ರಸ್ತೆಯಲ್ಲಿ ನಿಲ್ಲಿಸಿ, ಸವಾರಿ ಮಾಡಿಸಿ ಆಂಗಲ್ ಬದಲಾಯಿಸಿ ಫೊಟೊ ತೆಗೆದುಕೊಳ್ಳುತ್ತಲೇ ಇದ್ದರು!
ಕಾಡು, ಅಲ್ಲಲ್ಲಿ ಕಾಡಿನ ತೆಕ್ಕೆಗೆ ಹೊಂದಿಕೊಂಡಂತೆ ಗದ್ದೆ, ಹಳ್ಳಿ, ಮನೆಗಳು, ರಸ್ತೆ ಬದಿಯಲ್ಲಿ ಸಿಮೆಂಟಿಲ್ಲದೆ ತಾಳೆ ಎಲೆ, ಮಡಲು ಬಳಸಿ ಮಾಡಿದ ತಂಗುದಾಣಗಳು ಇವೆಲ್ಲವೂ ನಮ್ಮ ಸೋಜಿಗದ ಕಣ್ಣುಗಳಿಗೆ ಆಹಾರವಾದರೂ ಗ್ರಾಮಸ್ಥರ ಶಾಂತಿಯುತ ಆದರೆ ಒಡಲಲ್ಲಿರುವ ಅನೇಕ ನೋವುಗಳನ್ನು ಕಡೆಗಣಿಸುವಂತಿಲ್ಲ.
ಕಾಡು ದಾರಿ, ಜತೆಗೆ ಏರುದಾರಿ-ಇಳಿದಾರಿಯಾದರೂ ಮಳೆಗಾಲದ ತಣ್ಪಿನಿಂದಾಗಿ ಯಾವುದೇ ವಿಶೇಷ ಕಷ್ಟವನ್ನನುಭವಿಸದೆ ಯಾಣ ರಸ್ತೆ ಮುಗಿಯುವ ಕೊನೆಯ ಭಾಗ ಸೇರಿಕೊಂಡೆವು. ಅಲ್ಲೊಂದೇ ಒಂದು ಅಂಗಡಿಯಲ್ಲಿ ಚಹಾ ವಿರಾಮ, ಅಲ್ಲೇ ಬದಿಯಲ್ಲಿ ಸೈಕಲ್ಲನ್ನು ಭದ್ರವಾಗಿರಿಸಿ ಒಂದು ಕಿ.ಮೀ ಚಾರಣ.
ದಾರಿ ಪಕ್ಕದ ಸಣ್ಣ ತೊರೆ, ಜಲಪಾತದಲ್ಲಿ ಮತ್ತೊಂದಷ್ಟು ಫೊಟೊ ಶೂಟ್ ಆಗಿ ಮೇಲೇರುತ್ತಾ ಮೊದಲು ಸಿಕ್ಕಿದ್ದು ಗಣಪತಿ ದೇವಸ್ಥಾನ, ಎಡಗಡೆಯಲ್ಲಿ ವಿನೂತನ ರಚನೆಯ ಮೋಹಿನಿ ಶಿಖರವಾದರೆ ಮತ್ತೆ ಮೆಟ್ಟಿಲಲ್ಲಿ ಏರುತ್ತಾ ಹೋದರೆ ಅದು ತಲಪುವುದು ವಿಶಾಲವಾದ ಭೈರವೇಶ್ವರ ಶಿಖರದ ಬುಡಕ್ಕೆ. ಅಲ್ಲಿ ಮತ್ತೆ ಭೈರವೇಶ್ವರನ ಗುಡಿ ಶಿಲಾರಚನೆಯ ಬುಡದಲ್ಲೇ ಇದೆ.
ಭಸ್ಮಾಸುರ ಮೋಹಿನಿ ಪುರಾಣಕಥೆಯೊಂದಿಗೆ ಮಿಳಿತವಾಗಿ ಈ ಎರಡು ಬೃಹತ್ ಕಲ್ಲುಗಳಿಗೆ ಮೋಹಿನಿ ಶಿಖರ, ಭೈರವ ಶಿಖರ ಹೆಸರು ಬಂದಿದೆ. ಗಾತ್ರದಲ್ಲಿ ಎತ್ತರವಿರುವುದು ಭೈರವ ಶಿಖರ. ಮೋಹಿನಿ ಶಿಖರ 90 ಮೀಟರ್ ಎತ್ತರವಿದ್ದರೆ ಭೈರವೇಶ್ವರ ಶಿಲಾಶಿಖರ 120 ಮೀಟರ್ ಇದೆ. ಇವುಗಳಲ್ಲಿ ಅಲ್ಲಲ್ಲಿ ದೊಡ್ಡಜೇನುಹುಳುಗಳ ಗೂಡು ವಿಶೇಷ ಮೆರುಗು ನೀಡುತ್ತವೆ. ನಮ್ಮ ಸೈಕಲ್ ದಿರಿಸಿನ ಕಾರಣದಿಂದ ದೇವಸ್ಥಾನದೊಳಗೆ ಹೋಗದೆ ಹೊರಗಿನಿಂದಲೇ ನಮಿಸಿ ಮತ್ತೆ ಕೆಳಗಿಳಿದೆವು. ಅಷ್ಟರಲ್ಲಾಗಲೇ ಹೊಟ್ಟೆ ತಾಳ ಹಾಕಿದ್ದರಿಂದ ತಳಭಾಗದ ಪಾಕರ್ಿಂಗ್ ತಾಣದ ಚಹಾದಂಗಡಿಯಲ್ಲಿ ಪ್ಲೇಟ್ ಮ್ಯಾಗಿ ಹೊಟ್ಟೆಗಿಳಿಸಿ ಮತ್ತೆ ಸೈಕಲ್ ತುಳಿಯಲು ಶುರುವಿಟ್ಟರೆ ಮಧ್ಯಾಹ್ನ 2.30 ಸುಮಾರಿಗೆ ನಾವು ಕಾರು ನಿಲ್ಲಿಸಿದ ಕುಮಟಾದ ಪಾಂಡುರಂಗ ಹೊಟೇಲ್ ಆವರಣ ತಲಪಿದೆವು. ಮತ್ತೆ ವೇಷ ಪಲ್ಲಟಿಸಿ ಕಾರೇರಿದವರು ರಾತ್ರಿ ವೇಳೆಗೆ ಮರಳಿ ಮನೆಗೆ.
ಭೈರವೇಶ್ವರ ಶಿಖರ, ಅಂತರ್ಜಾಲ ಚಿತ್ರಕೃಪೆ
ಮೋಹಿನಿ ಶಿಖರ, ಅಂತರ್ಜಾಲ ಚಿತ್ರ ಕೃಪೆ
Related Posts Plugin for WordPress, Blogger...