ಪ್ರಯಾಣ

ತಲೆ ಚಿಟ್ಟು ಹಿಡಿಸುವ
ಶಬ್ದಕೂಪದಲ್ಲಿ
ನಿನ್ನ ಮನೋತಲ್ಲಣದ
ಹಿಂದಿನ ಮೌನ ಅರಸಿ
ಬಂದಿದ್ದೇನೆ
ಅರ್ಥವಿಲ್ಲದ ಪದಗಳು
ಅಂಕೆಯಿಲ್ಲದ ಶಬ್ದಗಳ
ನಡುವೆ ಬರೀ
ಪ್ರಯಾಸದ ಪಯಣ

ನಿನ್ನ ಕಣ್ಣಕೊನೆಯಿಂದ
ಬಿದ್ದ ಬಿಂದುಗಳನ್ನು
ಅಕ್ಷರಸಾಗರದಿಂದ
ಆಯ್ದುಕೊಳ್ಳಬೇಕಿದೆ
ಅಕ್ಷರ ಸಂತೆಯಲ್ಲಿ
ನಿನ್ನ ಕಣ್ಣಹನಿಗಳು
ನನಗೆ ಅಮೂಲ್ಯ

ನಿನ್ನ ಅಂದಿನ ಮುಗುಳ್ನಗು
ಬೇಕಿತ್ತೇ...
ಗೊತ್ತಿಲ್ಲ
ಆದರೂ ಅದೊಂದು
ಕಾಡುವ ಒಗಟು
ಬದುಕಿನ ಜಂಗುಳಿಯಲ್ಲಿ
ಆ ಒಗಟು ನನ್ನನ್ನು
ಮುನ್ನಡೆಸುತ್ತದೆ

ಚಿತ್ರ: www.dreamstime.com

ಬಿಸಿಲಿನ ಹನಿಗಳು

ಕಾದ ನೆಲದ ಮೇಲೆ

ಬಿದ್ದ ಎರಡು ಕಣ್ಣೀರ

ಹನಿಗಳು

ನನ್ನ ಹೃದಯದ

ನೋವನ್ನು ನಿನಗೆ ತಿಳಿಸಲಾಗದೆ

ಮರೆಯಾದವು

*******

ಬಿಸಿಲು ಬಿಸಿಲೆಂದು

ಬೈಯಲೇಬೇಕಿಲ್ಲ

ನೆರಳನ್ನು ಪ್ರೀತಿಸುವುದಕ್ಕೆ

ಕಾರಣ ಬಿಸಿಲು

ಬಯಲಿನ

ಮರದ ಚೆಲುವು ಹೆಚ್ಚಿಸಿದ್ದು

ಅದುವೇ..

ನೀನಿಲ್ಲದ ಇರುಳಿನ

ತಾಪಕ್ಕೆ ನನ್ನ ಬೇಗೆ ಏನೇನಲ್ಲ

ಎಂದು ಸಾರಿದ್ದೂ ಬಿಸಿಲೇ !

******

ಬಿಸಿಲಿಗಿಂತ

ನೆರಳೇ ಲೇಸೆಂದು

ಬಂಡೆಯ ಮರೆಗೆ

ಸರಿದ ಕಪ್ಪೆಯನ್ನು

ಬಲುಹಸಿದ ಹದ್ದು

ಕೊಂಡೊಯ್ದಿತು !

ಚಿತ್ರಕೃಪೆ:

www.flickr.com/photos/hirotokyo/4080312692/