ಕಲ್ಪನೆ

ಕಲ್ಪನೆಯೆಂಬ ಪೆಡಂಭೂತಕ್ಕೆ
ತಲೆ, ಕೈಕಾಲು
ಕಣ್ಣು, ಮೂಗು ಯಾವುದೂ ಇಲ್ಲ
ಆದರೂ, ಕಲ್ಪನೆ
ಹೆದರಿಸಿಬಿಡುತ್ತದೆ
ಬ್ರಹ್ಮರಕ್ಕಸನಿಗಾದರೂ
ವಿಕರಾಳ ಮುಖ,
ಉದ್ದುದ್ದ ಉಗುರು
ಕೋರೆ ಹಲ್ಲು ಇರುತ್ತದಂತೆ
ಅದಕ್ಕಾದರೂ ಬೆದರದೇ ಇರಬಹುದು
ಆದರೆ
ಕಲ್ಪನೆ ಎದೆ ನಡುಗಿಸಿಬಿಡುತ್ತದೆ
ಕಲ್ಪನೆಗೆ ಆದಿ ಅಂತ್ಯ ಇಲ್ಲ
ಹುಡುಗಿಯ ಸುಂದರ
ಜಡೆ ಕಾಳಸರ್ಪವಾಗುತ್ತದೆ
ನಳನಳಿಸುವ ಹೂಗಳೆಲ್ಲ
ಭಗ್ಗನೆ ಉರಿದು ಕೆನ್ನಾಲಿಗೆ
ನಲಿಯಬಹುದು!
ತಣ್ಣನೆ ಮಲಗಿದ ಸರೋವರ-
-ದ ಗರ್ಭದಿಂದ ಸುನಾಮಿ
ಎದ್ದು ಬರಬಹುದು.
ಅದಕ್ಕೇ ಕಲ್ಪನೆಗೆ
ಹೆದರುತ್ತೇನೆ ನಾನು