31.12.08

ಹೊಸವರ್ಷ ಎಂಬ ಒಗಟು!

ಗೋಡೆಗೆ ಹೊಸ ಕ್ಯಾಲೆಂಡರ್‍
ಸ್ವಾಗತಿಸುವ ಹುರುಪು
ಪೆನ್ನಿಗೆ ಹೊಸ ದಿನಚರಿ ಪುಸ್ತಕದಲ್ಲಿ
ಬರೆಯುವ ಆತುರ...
ಎಲ್ಲೆಡೆ ಹೊಸತನದ ಚಿಹ್ನೆಗಳು
ಕಾಣಿಸುತ್ತಿವೆ
ಮನಸು ಮಾತ್ರ ಯಾಕೆ
ನಿನ್ನ ಹಿಂದೆ ಹಿಂದೆ???

**********
ಟೇಬಲಲ್ಲಿ ಅಡ್ಡಾದ ಬಾಟಲಿ
ಕಣ್ಣತುಂಬ ಝಗಮಗ ಲೈಟು
ನಶೆಯೇರಿಸುವ ನರ್ತಕಿ ಕೈಗೆ
ಗರಿಗರಿ ನೋಟು
ತಳ್ಳಿ
ಅಪರಾತ್ರಿಯಲ್ಲಿ ಕಾರಿಂದ
ಇಳಿದು ತೂರಾಡುತ್ತಾ
ಮೋಡದ ಮರೆಯಲ್ಲಿ
ಅವಿತ ಕಳ್ಳ ಚಂದಿರನಿಗೆ
ಹೇಳುತ್ತೇನೆ
ಹ್ಯಾಪಿ ನ್ಯೂ ಇಯರ್‍!!!

***********
ಮನದ ಭಿತ್ತಿಗಳಲ್ಲಿ
ಅಸಂಖ್ಯ ನೆನಪಿನ ಬಲೆ
ಕಟ್ಟಿಕೊಂಡಿವೆ...
ಅಧ್ಯಾಯಗಳು ಹಲವಿದ್ದರೂ
ಡೈರಿಯ ಪುಟಗಳು
ಖಾಲಿ ಉಳಿದಿವೆ
ವರ್ಷದುದ್ದಕ್ಕೂ
ನಿನ್ನೊಂದಿಗಿದ್ದರೂ
ನಿನ್ನ ಹೆಗಲಿಗೆ
ತಲೆಯಾನಿಸಿ ಕಿವಿಯಲ್ಲಿ
ಉಸುರಬೇಕಾದ
ಯೋಚನೆಗಳೆಲ್ಲ
ಕಳೆದ ವರ್ಷದ ಹೆದ್ದೆರೆಯೊಂದಿಗೆ
ಕೊಚ್ಚಿಕೊಂಡು ಹೋಗುತ್ತಿವೆ

*********

ಹೊಸವರ್ಷ ಎಂದರೆ
ಎವರೆಸ್ಟಿನಂತೆ ಎತ್ತರವಾಗುವ
ಅನೂಹ್ಯತೆಯೇ?
ಸಮುದ್ರದ ಆಚೆ ಅಲ್ಲೇನಿದೆ
ಎಂಬಂತಹ ಕುತೂಹಲವೇ?
ಓದಿದರೂ ಅರ್ಥವಾಗದೆ
ಕಾಡುವ ಒಗಟೇ?

5 comments:

shivu.k said...

ವೇಣು ಆನಂದ್,

ಹೊಸ ವರ್ಷದ ಶುಭಾಶಯಗಳು..

sunaath said...

ವೇಣು ವಿನೋದ,
ನಿಮ್ಮ ಕವನ ಆಶಾದಾಯಕವಾಗಿದೆ.
ಹೊಸ ವರ್ಷದ ಶುಭಾಶಯಗಳು.

ಚಿತ್ರಾ ಸಂತೋಷ್ said...

ಹೊಸ ವರುಷದ ಶುಭಾಶಯಗಳು ಸರ್...
-ಚಿತ್ರಾ

ಎಂ. ಮಹೇಶ್ ಭಗೀರಥ said...

ಕಳೆದ ಕಾಲದ ಸ್ಮಶಾನದಲ್ಲಿ
ನೆನಪುಗಳ ಭೂತಗಳು
ಕುಣಿಯತ್ತಿವೆ; ಕಾಡುತ್ತಿವೆ..!
ಕಾಲ ಸಾಯುತ್ತದೆ ಏಕೆ?
ನೆನಪುಗಳ ಭೂತ ಸೃಷ್ಟಿಸಲೇ?!

ವಿನಾಯಕ ಭಟ್ಟ said...

First kavana supper....

Related Posts Plugin for WordPress, Blogger...