ಭಾನುವಾರದ ಹೊತ್ತು

ಭಾನುವಾರವೆಂದರೆ ಹಾಗೆ
ಒಂದು ಬೊಗಸೆ
ಅಮೃತವನ್ನು
ಹಿಡಿದು ನಿಂತಂತೆ...
ಥಟ್ಟನೆ ಸೋರಿ ಹೋಗಿ ಬಿಡುತ್ತದೆ
ಏನೇನೋ ಮಾಡುವ
ಯೋಚನೆ-ಯೋಜನೆಗಳು
ಸರ್ಕಾರದ ಕಾರ್ಯಕ್ರಮದಂತೆ
ಶೈಶವ ಬಿಟ್ಟೇಳವು!


ಕಣ್ಣಲ್ಲೇ ಅಂಟಿಕೊಂಡ ನಿದ್ದೆ
ಕಪ್ಪಲ್ಲೇ ಆರಿದ ಕಾಫಿ
ಮುಂದಕ್ಕೋಡದ ಕಾದಂಬರಿ
ಹಾರ್ಡ್ ಡಿಸ್ಕಲ್ಲೇ ಉಳಿದ
ಹೊಸ ಸಿನಿಮಾ
ಅಳಿದುಳಿದ ಮೊನ್ನೆಯ ಸಾಂಬಾರು
ಫ್ರಿಜ್ಜಲ್ಲಿದೆ ಕೆಎಫ್‌ ಬೀರು
ಉಫ್‌..
ಈ ಭಾನುವಾರಕ್ಕೆ
ಎಷ್ಟೊಂದು ಷೆಡ್ಯೂಲುಗಳು!


ಹಿಂದಿನ ವಾರದ ಧೂಳು
ಕೊಡವಿದಾಗ
ಹಳೆಯ ದಿನಪತ್ರಿಕೆಗಳ
ಪೇರಿಸಿದಾಗ
ಸಂಗಾತಿಯ ಗಂಟಲಿಂದ
ಹೊರಹೊಮ್ಮುವ ಕೆಮ್ಮಿಗೆ
ನಾನಾ ಅರ್ಥ!


ತಡವಾಗೆದ್ದು,
ಏನೋ ತಿಂದು
ಮಧ್ಯಾಹ್ನದ ಊಟ ಸಂಜೆ
ಮಾಡಿದಾಗಲೇ
ಮರುದಿನದ ಕೆಲಸಗಳೆಲ್ಲಾ
ಧುತ್ತನೆ ಎದುರು
ಬಂದು  ಕಣ್ಣು ಮಂಜಾದಾಗ
ಅನಾಥಭಾವ
ಛೇ..
ಹಿಡಿಯಷ್ಟು ಭಾನುವಾರ
ಉಳಿಸಿಕೊಳ್ಳಲಾಗಲಿಲ್ಲ!