ವೈಶಾಖದ ನಿಟ್ಟುಸಿರು

ಬಯಲುಬೆಟ್ಟದ ಹಾದಿಯಲ್ಲಿ
ಬೀಸುವ ಗಾಳಿಯೂ

ಬಿಸಿಯಾಗಿದೆ, ಬಹುಷಃ
ನಾನಿಲ್ಲದೆ ನಿನ್ನ ನೋವು
ಇನ್ನೂ ಹಸಿಯಾಗಿದೆ
.......

ನಗರದ ರಾತ್ರಿಗಳು
ಜಗಮಗಿಸುತ್ತವೆ ದೀಪಗಳು
ಕೋರೈಸುತ್ತವೆ ನಾಳೆಯೇ
ಇಲ್ಲವೇನೋ ಎಂಬಂತೆ!
ಚಂದಿರನಿಗೂ ತನ್ನ ಮೇಲೆ
ಕೀಳರಿಮೆ ಬರುವಂತೆ!
.......

ಒಣಗಿ ಹೋದ ನದಿ
ದಂಡೆಯಲ್ಲಿ ಕುಳಿತ
ಒಂಟಿ ಕಪ್ಪೆ ಉದಾಸೀನದಲ್ಲಿ
ಮಳೆಗಾಲದ ಪ್ರವಾಹ ನೆನೆದು
ವಟಗುಟ್ಟುತ್ತಿದ್ದರೆ
ಮಣ್ಣಿನ ಅಡಿಯಲ್ಲಿರುವ
ನೀರಿನ ಪಸೆ ಅಸಹಾಯಕವಾಗಿ
ಅಳುತ್ತಿದೆ!
..........

ಒಂದು ಭಯಂಕರ
ಬೇಸಿಗೆ ರಾತ್ರಿ
ಕನಸಿನಲ್ಲೂ ನೀನು
ನನ್ನ ಹತ್ತಿರ ಬರಲು
ಬೆದರಿಬಿಟ್ಟೆ..


(ಒಂದು ಉದಾಸೀನದ ಭಾನುವಾರ ತಲೆಯಲ್ಲಿ ಹುಟ್ಟಿಕೊಂಡ ಪಲುಕುಗಳು)
ಚಿತ್ರ: ಅಂತರ್ಜಾಲದಿಂದ