ಬಣ್ಣಗೆಟ್ಟ ಕ್ಯಾನ್ವಾಸ್

ಕಲಾವಿದನ ಕುಂಚದಲ್ಲಿ
ಅರಳಿದ್ದ ಆ ಸುಂದರ
ಭೂದೃಶ್ಯವೆಲ್ಲ ಎಲ್ಲಿ
ತೊಳೆದು ಹೋಯಿತು?
ಗಾಢವಾಗಿದ್ದ ಆ
ಹಸಿರುಮರಗಳ ಸಾಲು
ನಸುನೀಲ ಬಣ್ಣದ
ಬೆಟ್ಟದ ತೆಕ್ಕೆಯಲ್ಲಿದ್ದ
ಗುಡಿಸಲು
ಎಲ್ಲಿ ಗುಡಿಸಿ ಹೋಯಿತು?
ಕಲಾವಿದನಿಗೇ ಅಚ್ಚರಿ
ಈಗೀಗ ಕುಂಚದಲ್ಲಿ
ಕೆಲವು ವರ್ಣಗಳು ಅರಳುವುದಿಲ್ಲ
ಎಲ್ಲೇ ನೋಡಿದರೂ ಬರಿಯ ಕೆಂಪು,
ಕ್ಯಾನ್ವಾಸಿನಿಂದ ರಕ್ತ ಚೆಲ್ಲಿ
ನದಿಯುದ್ದಕ್ಕೂ ಹರಡಿಕೊಂಡ ಹಾಗೆ
ಜೀವಂತಿಕೆಯ ಬಣ್ಣಗಳನ್ನೆಲ್ಲಾ
ನುಂಗಿದ ಹಾಗೆ
ಅದಕ್ಕಾಗಿ ಕಲಾವಿದ
ಕುಂಚ ಕೆಳಗಿಟ್ಟಿದ್ದಾನೆ
ಬಣ್ಣಗಳು ಬಣ್ಣಕಳೆದುಕೊಂಡಿವೆ