ಹೆದ್ದಾರಿ ಕಥೆಗಳು-೨

 ಅದೊಂದು ಛಳಿಗಾಲದ ಇಳಿಹೊತ್ತು..
ಹಗಲಿಡೀ ವಾಹನಗಳ ಭರಾಟೆಯಿಂದ ಹೈರಾಣಾಗಿ ಹೆದ್ದಾರಿ ವಿಶ್ರಾಂತಿಗೆ ಇಳಿದಂತಿತ್ತು. ಅರಣ್ಯದ ನಡುವೆ ಹಾದು ಹೋಗುವ ಘಾಟಿ  ದಾರಿಯದು, ರಾತ್ರಿಯಾದರೆ ವಾಹನಗಳ ಸಂಖ್ಯೆ ಕಡಿಮೆ. ಆಗಲೇ ಸೋಡಿಯಂ ವೇಪರ‍್ ಲೈಟುಗಳಿ ಮಿನುಗಲು ತೊಡಗಿದ್ದವು.
ಗಂಟೆಗಳುರುಳಿದವು. ಜೀಪೊಂದು ಕೇಕೆ ಹಾಕುತ್ತಾ ತೂರಾಡುತ್ತಾ ಬಂತು.
ಒಳಗಿರುವವರ ಪರಿಸ್ಥಿತಿ ಹೀಗಎಯೇ ಇರಬಹುದೆಂದು ಊಹಿಸಿ ಹೆದ್ದಾರಿಗೆ ನಗೆಯುಕ್ಕಿತು. ಯಾರೋ ನಕ್ಕಂತಾಗಿ ಡ್ರೈವಿಂಗ್‌ ಸೀಟಿನಲ್ಲಿದ್ದವನಿಗೆ ಸಿಟ್ಟು ಬಂತು. ಹಿಂದಿನ ಸೀಟಲ್ಲಿದ್ದವರಿಗೆ  ತೊಡರು ನಾಲಗೆಯಲ್ಲೇ ಬೈದ..ಸು..ಮ್ನೆ ಕುಂತ್ಕ..ಳ್ಳಿ..ಇಂಥವರನ್ನ ದಿನಾ ನೋಡುತ್ತಿದ್ದ ಹೆದ್ದಾರಿಗೆ ಮತ್ತೂ ನಗುಬಂತು, ಡ್ರೈವರನ್ನು ಇನ್ನಷ್ಟು  ಪೇಚಿಗೆ ಸಿಲುಕಿಸಲು ಮತ್ತೊಮ್ಮೆ ಗಟ್ಟಿಯಾಗಿ ನಕ್ಕಿತು. ಈ ಬಾರಿ ಅಮಲಿನಲ್ಲೂ ಎಲ್ಲರಿಗೂ ನಗು ಕೇಳಿತು. ನಗು ಮತ್ತೆ ಮತ್ತೆ ಬಿಚ್ಚಿಕೊಳ್ಳುತ್ತಾ ಹೋದಾಗ ಆ ನಗು ತಮ್ಮದ್ದಲ್ಲ ಎಂದು ಸ್ಪಷ್ಟವಾಯಿತು. ಡ್ರೈವರನಿಗೆ ಚಿಕ್ಕವನಿದ್ದಾಗ ಕೇಳಿದ ಭೂತ ಪಿಶಾಚಿ ಕಥೆಗಳು ನೆನಪಾದವು, ಕೈ ಮರಗಟ್ಟಿತು. ಒಂದೊಂದು ಮರಗಳೂ ಒಂದೊಂದು ಆಕಾರ ಪಡೆದು ನರ್ತಿಸತೊಡಗಿದವು. ರಸ್ತೆಯೇ ದಢೀರ್‌ ಎದ್ದು ನಿಂತಂತಾಯಿತು. ಆ ಕೊರಕಲಿನ ತಿರುವಿನಲ್ಲಿ ಸ್ಟೀರಿಂಗ್‌ ತಿರುಗಲೇ ಇಲ್ಲ.....
ಆ ತಿರುವಿನಲ್ಲೊಂದು ಫಲಕವಿತ್ತು.
ಎಚ್ಚರಿಕೆ ! ಅಪಘಾತ ವಲಯ!

ಒಂದು ಬೀದಿ ಕಥೆ

ಮೊನ್ನೆ ಬಿದ್ದ ಮಳೆಗೆ

ಕೊಚ್ಚೆರಾಡಿಯಾಗಿದ್ದ

ಬೀದಿಯಲ್ಲಿ ಈಗ ಬಿಸಿಲಹಬ್ಬ

ನೆರೆಯ ನೆರಳ

ಮರಗಳಿಂದ ಬಿದ್ದ

ಕಂದು ಹಳದಿ ಎಲೆಯ ದಿಬ್ಬ

ಹಾಸಿಗೆಗಂಟಿಸುವ

ಮಳೆಯಿಲ್ಲ ಹಾಗಾಗಿ

ಬೀದಿಗೊಂಥರಾ ಸಂಭ್ರಮ

ಮುಂಜಾನೆಯ ಪೇಪರ್‍

ಹುಡುಗನ ಸೈಕಲ್ಲು

ಹಾಲಿನವನ ಮೋಪೆಡ್ಡು

ಶಾಲೆ ಹುಡುಗರ

ಉತ್ಸಾಹವೇ ತೋರಣ

ಮೀನ ಬುಟ್ಟಿಯಿಂದ

ಸೋರಿದ ಮತ್ಸ್ಯಗಂಧ

ಬಿರಿದ ಸಂಪಿಗೆಯ ಮಕರಂದ

ಪಯಣಿಗರಿಗೆ ಈಗ

ಬೀದಿ ಪರಮಾಪ್ತ

ರಾತ್ರಿ ಮತ್ತೆ ಬೀದಿಗೆ ಜ್ವರ

ರಸ್ತೆಯಗಲ ಮಾಡುವಾಗ

ಕಳೆದುಹೋದ ಆಲದಮರ,

ಕಟ್ಟೆಯಲ್ಲಿ ಮಲಗೆದ್ದು

ಓಡುವಾಗ ಬಸ್ಸಡಿಗೆ ಸಿಕ್ಕ

ನಾಯಿಮರಿ

ಇಲ್ಲದೆ ಬಿಕ್ಕುತ್ತಿದೆ ಬೀದಿ

ಬಿದಿಗೆ ಚಂದಿರನ

ಮಂಕುಬೆಳಕಲ್ಲಿ ಅಂತ್ಯವಿಲ್ಲದೆ

ಬಿದ್ದುಕೊಂಡಿದೆ ಹಾದಿ